Course description

Kokbwkha:-

 Hayungo dophani hangraini bagwi saktharnai tai wansukrai borokrog aswk bangthaya. Kwbangkukno tongthok chathokbi bisingtwi lairwi ulo dophani samungo yak riui samung paijakya wngo. Yakthakys samung tangwi paimani ulo dophani hamkrai samung baino lukurogno tongthokrwna lama rutugwi mano. Dopha hamkraini bagwi wansukgwi sichajak borok kwbangmano abotwi khe borogni langmano laiui thangkh. Abohai khe dophani samungrog lerwi tangjakma bai buibai baksa wngwi manthani kebengmungrog nukjagwi tongo. Aboni bagwino Bui samung tangwi lenglama jorao mwnak hor diporo sichalaimani hai wngo. Tabuk buibai sak baksa wngnani  hinkhe buinisai bara lenglama kwrwikhe samung tangnani nangkha. Aboni bagwi no hopung sapungno bathakma kwrwi khe tabuk samung tangnani nangkha. Bosongni borok sichajak kisaswkrog dopha hamkraini samung tangwi tongphano bebak borok abotwi wngya. Baksa borokrog buino phunuknani simi eba mung Nani bagwi simi bo ereng ereng dophani samung tangwi phunugo. Phiyaba dophani bagwi kha rwui wansuk kwthar wansuknai borok bangya   wngma bai samungrog aswk chasugwi manya. Dopha hamkraini bagwi jeswk wansukjago abobai mwkthangni tongmung chalwi tongphano borok khoroksano hodani tai baithang I wngmabai imang nukmani samungbai mukthangni tongmungni bising nokhasa khujak pherlaimung nukjagwi tongo. Laiui thangjak jorano tai kiphilui manya  wngmatwi samung chengnani swkangno dophani bagwi jeswk eba jetwi wansukmani aboswkno tongrwrwi thango. Chengnani swkangno ang bai chengma Lai thangmani ulni ang kwrwngsao no tongo mungsabo  phermung kwrwi. Aro ang bai ang Ni bising pherlaimung dalsano tongrwgwi thango, abo wngkha jorani holong kosom.

What will i learn?

• O koklopni bisingtwi chwng saui mankha chini borokrogni langmao jora kaham bo phai O hamya bo phaio. Jora hamya phuru jeswk khlai bo samung phano chaya wngo. O jora hamya o kebengnai, musunai,hamyao khiklaina muchungnai borokni biyal kwrwi. Aro khursajak jorani "holong kosom " wngkha Sakmang gwnang borok tei bini imang nukmano mwkthang swnamna muchungmani lamano kebengnairogni kokno sajak Kha. O borok Bini baithangni jaiti eba bosongni hukumu-mukumuno mwthangwi narwknani saktharmani kasunai,kebengnai,musunairogno holong kosom hinui sajak kha. Chwng jesabo samung tangwi khani mwchungtwi bwthai Mankha hinkhe Kha swrangwi tongthogo. Sak sikla sago Phan kwtal khaui phaima jorao jesabo chasamanino naithoknani, Thinang chwngsarwnani nuk khe saui mankhe Bolong sikla nugui tongthokma haino khapang Kha swrangwi tongthokgwi phai O. Aro sikla chasolok jorani swrangwi phainani khapangni kokno-no Sajak Kha.

Frequently asked question