Course description

Kokbwkha:-

 Chini borokrogni bising swkang rwngnokrog kwrwini bagwi okra chakrarog cherairogno sarikphango tal pilala nokhlao cherairogno Kerang kothomarog saui khwnarwo. Abotwi kerang kothomani bisingtwi borog cherairogno tamo khlaina nang, bobotwi khe tongna nang aborog phwrwngo. Abotwi kerang kothomani bising thaisa wngkha kuwai kendara. O kuwai kendara kothomao nok kuridok nokdok, chalai kuridok chalaidok kami khungsao sajwla khoroksini twiui randijwk khoroksa tongmani. Bini bwsajwla song belai tongwrwng chaya, seler buini kok khwnaya tongmani. O bwsajwla song selerni bagwi buma randijwk nukhungni samung kaphwraui ma tongjao. Abotwini salsao mogodam bari tangphuru chibuk hajikorni bwtwi Manwi no-go muikwthwng kwrwini bagwi chakhwi songwi bwsalasongno chario. O chakhwi machaui bwsala song thokjagwi chibuk hajikorni bahan chanani kha thonlaio. Phiyaba chibuk hajikor borokni khuk ruwaibai phan kwrak tai kwthang tongma bai tai takhuksini song lukuni samung hamya khlaima bai swraijagwi chibuk hajikorno butharwi manliya. Borog chibuk bai mechenjagwi mangwi khibijago. Aboni ulo buma randijwk mogodam bario kuwai kendara bwthai manwi chaui kuwai kendara amchaio.

   Kuwai kendara torwi buini khugo bwtasong thwimani kok khwnaui bwtasongno butharwi chibukno butharnani tai bwtasongno mwthangnani panjio. Kuwai kendara belai borok kaham tai buini samung kaham tangma bai lukurogno khuk hamari manwi chibuk hajikorno butharwi mankha. Chibuk hajikorni bohok bisingo bwtasongni bekereng manwi dongorni Twi tulsi bwlaibai sarsaui bwtasongno mwthangwi tisao. Phiyaba bwtasong gwrwng chaya wngma bai tai bono siniya wngui arono khaui chibuk hajikorni bahan tubuoi no-go phailaio. Ulo buma randijwkbai buphayung kusuni Kok swngjagwi bebak kok saoi takhuksinirog taisa bolongo thangwi yakung yak khajak kuwai kendara nogo kiphilwi tubuo. Aboni ulo randijwkmani bwsarog bebagono gwrwng kaham wngwi thangbai O tai sal kolokma romui borog kaham Kwrwng khe tonglaikha.

What will i learn?

• Kuwai kendara belai tongwrwng kaham tai buini hamari khwlainai borok. Bo sakni hamarino aswk naiui okra chakrarogni kok khwnaui tongo tai nukhungni hamarini bagwi saktharo. Abotwi gwrwngni bagwi bo bwtasong mwthangna bagwi bwkha panjio. Buma mana khwlaiuibo bo bumano koiui ruwai sanwi kamini okra chakrarogni khukbai nao. Kamini okra chakrarogbo borok kaham tai tongwrwng kaham no khuk hamari two. Chibuk butharna thangphuru bo lama ganani buini hukni sosarog muimudukrog dong rwjakya tongmarogno dong riui kwlango huk tangjakya tongmarokno tangwi kwlango,gairing tangjakya tongmarokno tangwi kwlango. Bo abotwi samung kaham tangma baino lukurogno bono palkhe khuk hamari rwna nangkha. Lukuni khuk hamari manwino bo saichungno chibuk hajirokno butharwi bwtasongno mwthango. Bwtasongno mwthango simiya, bo okrarogni Kok khwnaui tongnai wngmarok baino bwtasong bono bolongo khaui kab phuru bo bwtasongni Kok khwnaui tongkha.

Frequently asked question